Geyer Anna Maria

Mev. Geyer was die middag besig om haar hoenders in die hoenderhok op die plaas te voer toe sy deur twee jong mans oorrompel is. Die aanvallers (onderskeidelik 19 en 21 jaar oud) het haar met ’n mes en ’n panga aangeval en haar keel afgesny. ’n 53-jarige plaaswerker, Douglas Tshoki, wat naby die hokke was, is deur die mans met draad vasgebind en sy mond is met lappe toegestop sodat hy nie kon skree om hulp nie. Haar man, mnr. Wikus Geyer (70), was sowat 300 meter verder by die voerkrippe besig om na die beeste se water te kyk. Hy het sy vrou se noodkrete gehoor en na die huis gehardloop. Hy het egter te laat gekom; sy is op die toneel dood. Die jong mans het vroeër die dag na die plaas gekom om vir werk te vra. Daar is uiteindelik niks gesteel nie. Die polisie het vermoed dat die aanvallers grootgeskrik het toe mnr. Geyer opdaag en dadelik die berge in gevlug het. : Die polisie het ’n grootskaalse soektog geloods en die twee verdagtes is die volgende Sondag (twee dae later) gearresteer. Hulle is later in die hof tot lewenslange gevangenisstraf gevonnis. Die grootste hartseer is dat haar broer, Willem van der Westhuizen, 17 jaar na haar, ook op sy plaas vermoor is.