Malatadiane Florence

Die misdadigers het die plaas in die nag of vroeë oggendure geïnfiltreer en baie doelbewus te werk gegaan om geen getuies te laat oorleef nie. Die aanvallers het eerste toegeslaan op die eenkamerhuisie van die plaaswerker-egpaar, David Nkebenyane (56) en Florence Malatadiane. Mnr. Nkebenyane is in die skouer geskiet en sy vrou is in die arm geskiet. Hul liggame is later in hul kamer gevind. Dit blyk dat mnr. Johannes Jacobus Mostert (71) onraad gemerk het en probeer het om sy werkers te gaan help. Hy het egter in die lokval van die oortreders vasgeloop. Mnr. Mostert is in die kop en bors geskiet. Sy liggaam, sowel as dié van sy vrou, Susan (61), is in die hoofhuis gevind. Mev. Mostert het 'n besonder wrede dood gesterf; die aanvallers het haar met doringdraad versmoor. Die twee egpare het in daardie stadium reeds ses maande lank as bure op dieselfde plaas tussen Meyerton en Henley-on-Klip gewoon. Die polisie (onder leiding van destydse kaptein Shodo Mashobane) het bevind dat die oortreders bloot alle moontlike getuies van die misdaad wou uitskakel.Die wreedheid van die doringdraad-moord op mev. Mostert en die gelyktydige teregstelling van die getuies het destyds gelei tot grootskaalse woede in landelike gemeenskappe oor die gebrek aan aktiewe polisiëring.